Bisch gäg dr Busch, denn duesch McDonalds boykottiere.
Als fromme Moslem kasch e Schungge nit goutiere.
Als brave Bebbi waisch, dass mir kai Ziri-Gschnätzlets ässe sotte.
Bisch in der SVP, isch s Bindnerflaisch verbotte.
(Dootebainli, Comité-Bangg)

Dr ET het vor Joore unseri Ärde verloo.
Jetzt hän mir s Gfyhl, är isch wiider doo
Und scho hän mir ihn entdeggt
im Bundesroot als Schlumpf versteggt.
(Tourischte, VSG)

S Micheline Calmy Rey, die het jo wirgglig Pfuus
Si macht sogar der Huushalt in däm Bundeshuus.
Zer Wienacht het si, und do isch si bsunders froh,
vom Parlamänt e rächte Bääse gschänggt bikoo.
(Babberlababb, BSG)

Am Parteidaag vo dr SVP isch Gott sei Dangg
d Striggede gange als Schnitzelbangg.
Sy hän kaini spezielle Värs miesse mache:
s isch jo doch der Blocher, wo sait, wenn lache
(Fäärimaa, Comité-Bängg)

Bim Blocher syner Abwahl sin im Baabscht grad Trääne ko.
Vom beschte Mässwyy het är sich e Halbe bringe loo
O Herr, fir d Abwahl dangg ich dir und riehm di Himmelrych
jetz bi dr ainzig Unfählbaari ändligg wiider ych!
(d Syydiaane, Comité-Bängg)
Womit wir nun endgültig im klerikalen Bereich angelangt wären. Dazu aus regionaler Sicht Comité-Bangg Spitzbueb:
«Liebe Gott», due n y syt finf Joor bätte,
«mach uss em Bischof Koch e Nätte!»
Nach finf Joor Bätte waiss y jetzt:
Au em Liebe Gott sin Gränze gsetzt.

Dr Papst Benedikt erklärt bim Abendmahl:
Mir Katholike, mir sin s Original.
Jä denn sin doch – nur, das isch dumm,
mir Proteschtante halt s Genericum.
Diagnose: Und d Kirchestüür, duet dr Couchepin prahle,
muess künftig d Granggekasse zahle.
(Doggter FMH, Comité-Bängg)

E Huutarzt maint zur Glepfer-Froog, s Brobleem syg z leese.
S bruch statt us Rio jetzt halt Därm vo de Chineese.
Denn könnsch problemlos am e Wurschtsalätli nippe
und statt an Rinderwahn stirbsch halt an Vogelgrippe
(d Zahnstocher, Comité-Bangg)

Äxtrafiecht und superdünn und trotzdäm ryssfescht mien sy syy.
Am beschte mit em Gietesiegel, denn s muess zimmlig ebbis dry.
Mit Rille, Noppe und us Läder, Gummi oder Garn
isch uns doch schnuppe. Hauptsach: s aignet sich als Glepferdarm.
(Die Aabrennte, Comité 2000)

Bi der UBS – es isch e Gschyss
hets hundertduusig Schööfli – alli wyss
und de kasch gseh, wie das denn uusekunnt,
wenns numme Schoof het und kai Schäferhund.
(Die Verschiffte, Comité-Bängg)

Es maint die Frau vom Fundbüro:
Jä nai, sin sii scho wiider doo?
Zem letschte Mool, es isch verschwunde,
Herr Ospel, mir hänn ihr Gäld nid gfunde.
(Käller-Assle, BSG)

Kennte sii bitti vo ihrem Stuehl uffstoo
und drunter luege eb si dert nit noo
– bevor si alli Bach-ab verschwinde –
e baar Milliarde vom Ospel finde.
(Hanslimaa, Comité-Bängg)

Ych muess hit zoobe zuegää, Fremdwörter kenn ych nid so vyyl.
Ych bi halt nur e glaine Buur, kenn zum Byspyyl pädophil,
Waiss: maskulin haisst männlig, Nusscreem haisst Nutella.
Me waiss ych halt laider nid – doch: gäldgeil dasch vasella.
(Heiri, Comité-Bängg)

Dr Ospel het e SMS versändet an Vasella:
Nimmsch du nit au in näggschter Zyt e besser zahlti Stell a?
Dr Daniel losst sofort dur d Seggredärin d Antwort zische:
Mir kennte mitenander statt däm Inder Stroose wische.
(Schwoobekäfer, Comité-Bängg)

My Bueb, dr Max, är het chly Stress in Mathe und duet schiile,
isch haimlig ab mit all mym Gäld und isch es go verspiile.
Y ha dr Max vor d Hütte gstellt, do het dä uff dr Schwelle
als Abgangsentschädigung no fynf Joor Sagggäld welle.
(Stächpalme, Comité-Bängg)

Die mehr lokal-regionalen Kostproben des sehr erfreulichen Bänggler-Jahrgangs 2008 sind gleich eine Stufe tiefer nach zu lesen.
Von Strau- und anderen Frauen und Männern

Lokal-Regional Die ultimative Gesamtschau der Bänggler von Basel bis Riehen und vo Schönebuech bis Ammel, ämmel oder so: «Euse Erich» hat es zwar nicht ins Stöckli geschafft, dafür aber in den Bänggler-Olymp. Bevor der neo Alt-Regierungsrat zu Ehren kommt, hier noch ein passender Hinweis des zweitältesten Banggs:
Gits do inne ändli Rueh.
Iir looset uns jetzt alli zue!!
Mir dulden absolut kai Wiiderred und sages in scharfem Doon:
«Wenn numme ain vo euch uns nit luschtig findet, gehn mer in d Opposition.
(Stächmugge, Comité-Bängg)

Wo euse Erich, der «Fascht-Ständeroot»
mit Glanz und Gloria undergoht,
do froggt en d Präss: Herr Straumaa, sind si jetzt deprimiert?»
«Jo, der Depp bin y scho lang, aber s erschti Mool prämiert.
(Peperoni)

D Uni het kai Platz meh in dr Stadt, s lyt uff dr Hand,
Me züglet gly zum liebschte Partner, sprich: uff Baselland.
Klaar, dass me in Wintersinge scho e bitz närvös isch
derby hai die dr Straumaa als Brofässer für Französisch.
(Stächpalme, Comité-Bängg)

Ich bi e Baselbieter und Partner vo dr Stadt
Ich gang gärn ins Theater, au d Uni find ych glatt
und duesch öis öbbe frooge, ob mir meh zaale wei,
denn haissts nit, dass mer luege wei, denn sääge alli Nei!
(Heiri, Comité-Bängg)

E Studie sait, es syg e Schand,
dass d Schieler uss em Baselland,
gscheyter sin als die vo Basel.
Das halt y sicher nit fir Gfaasel.
Das kaasch fir alles gälte loo
s isch au bi de Regierigsreet esoo.
(dr Waggis, Comité-Bängg)

S Heyer Rösli isch jetzt Vieri
und au der Jüngscht vom Hof vos Bieri
Sy göhn in Chindergarte z Sissech zur Frau Ley
dört mien sy bald, me duet sich wehre,
scho im Chindsgi Hochdütsch leere.
Es finds nit jede guet, e mängge macht e Gschrey
Es isch doch wichtig, dass au mir die kaibe Rambasse verschtön,
well die doch spöter, wenn si gross sin, z Basel-Stadt in d Uni göhn.
(Striggede)

Dr Vorschlag vom Herr Eymaa isch im Grund gnoo e banaale:
fir jede Goof, wo nit rächt duet, solle d Eltere zaale.
Wurd me das Prinzip au fir der Grossroot ybernää
kennt me z Basel d Styyre uff ai Frangge aabenää.
(D Syydiaane)

By der Schneidere gheerts zue de Frooge, de haiggle:
Wie kaa me die Frau numme sinnvoll recycle?
D Herzog, wo soo gärn no d Styyre duet sängge,
die kennt me ganz aifach der Hailsarmee schängge.
(Anggewegglimaitli, Comité-Bängg)

Mir hätte gärn dr Bischof Koch an Morgestraich yglade.
Sy Goschdym basst und ebbis Luschtigs wurd däm Maa nit schade.
Dr Grund worum är abgsait het, lyt bi dr Ziibelewaije:
Är het drum schregglig Schiss, well so ne wältligs Gricht ka blaije.
(Schwoobekäfer, Comité-Bängg)

Jetzt hämmer gläse: D Rettigsring – es isch jo nit zem Fasse –
die solle sich – fyyn nüanciert – dr Farb vom Rhy aabasse.
Ghei eini vo dr Wettstaibrugg und gsehsch, dass die nit schwimmt,
so muesch si halt versuffe loo, Hauptsach: s Stadtbild stimmt.
(Die Blauäugige, Comité-Bängg)

Die Baselbieter Lütli sin gar e bsundere Schlaag.
Si schaffe und si wärche z Nacht lieber wie am Daag.
Wenn d Läde z Baasel schliesse foot s Gschäft by iihne aa,
denn kaasch s neij Harry-Potter-Buech als Kirchegsangbuech ha.

…singt der Comité-Bangg Gluggersegg. Mit deren obligatem Trämler-Vers schliessen wir die Trockenlese:
Dr Waagefiehrer Haiggi Hayer
rysst e Vollstopp mit sym Zwaier
und rennt uff s Hysli. Kasch nur hoffe
är het kai Basler-Wasser gsoffe

«Es sait dr Blocher während em Znacht ze syynere Blochere, won äär im Wuurschtsalat garniert duet ummestochere: In mym Departemänt entloss yych dääglig zwai; bald han ys gschafft, denn bin y ändlig ganz elai!» Singvogel

«Ych ha das Kunschtwärgg schnäll begriffe: zmitts in Paris an Blocher schiffe! Und drotzdäm find ychs biirewaich – dä isch doch immun – geege jeede Saich!» D’Filzluus

«Wenn ain mit hundertachzig Sache duur d´Gegend raast, wie nit ganz bache, ooni Ruggsicht uf Verluscht will er uf sy Freihait pocht, no muess das no kai Raaser syy – s kennt Aine syy wo blocht.» Peperoni

«´Ey, hesch e Stutz odr so, ey waisch für öbbis z´Ässe, ha grad e Loch, waisch, ha drum s Boortmenee vergässe. Ey danggschöön gäll un no ne schööne, odr so!´ Dasch der Finanzminischter Merz inkognito.» Stroossewischer

«Dr Bundesroot Hans Rudolf Merz het s Gryffemääli bsuecht. D´Maischter vo de Zimft hänn ganz verzwyyflet noon em gsuecht, wo isch denn nundedie dä wichtig Eeregascht verschwunde? Dr Ueli het en schliesslig in dr Sammelbiggse gfunde.» Rätschbääse

«Dr Schmiid deerf kaini Panzer kauffe und statt fliege, muess är laufe, är hett e Brieffli gschryybe, dä glaini Strääber ´Bestellung annulliert´ an Franz Carl Weber.» Super Bebbi

«Und am Silvester hann y miesse schnäll ins Röörli bloose ´null Komma siibe, s´isch in Ornig´ – doch jetzt mien si loose. E halb Stund spääter – s´isch Neujoor – hett´s mi wieder droffe ´null Komma säggs, styyge si uss, si sinn nämmlig bsoffe´.» D´Fätze

«Es haig der Gotthälf schyynts, vom Färnseh nit bifuegt, als Daagesgascht im Sahlewaidli yynegluegt. Är bitrachtet schwyygend das Brimborium; denn goht er zrugg ins Graab und drayt sich derten um.» Singvogel

«Der Ueli Muurer kunnt ins Bundeshuus lallt und schwanggt und seht gar griisli uus. Är het e braite Kopf, ganz e hoole, het vorhäär syym Sohn e Zygi gstoole.» Rotznase

«Dr Paapscht, dä fliegt vo Room uff Bäärn, die Bäärner hänn der Paapscht uuu-gäärn. Dr Chrigu seit zum Jöggu: ´Gäu, dä redt uu gschyyd und nid so schnäu.´» Alperöösli

«Mängi Moslem-Prediger dien beeses saage, Hass verbraite die, me ka s kuum no verdraage. Bi de Chrischte isch´s vyyl weniger makaaber, längscht verstoot do kaine me im Papscht si Glaaber.» Die Verlumpte

«Wenn me vierhundert Basler ka verhafte loo, mit ere grosse Schnuure uff d Wält isch koo, längt das liebi Ziircher ganz im Vertraue no lang nit zem e Stadion baue.» Dipflischysser

«Mit em neye Faarblaan, do laufts rund. No Bärn hesch nid emol e Stund, au no Ziri – und dert denn ney, bisch acht Stund uff dr Bolizey.» Bangg-Rott

«In Basel hets e Mässeturm, wo heecher isch als s Minschter. ´Da müend mir grad en höchere ha!´ beschliesst me z´Ziri finschter. Und ab däm Dirmli gseht dr Zircher denn, e so verluttet, wie an dr EM z’Basel me im neje Stadion schuttet.» Schwobekäfer

«Ziircher, lueg nid so druurig dryy, nid jeede ka dr Beschti syy, au Du kasch ebbis, das liegt dinn, es kunnt uns aifach nyt in Sinn.» Nachtschwärmer

«Vor em Bundeshuus do spritze jetz Fontääne. Mir finde, dass me das nit bsunders muess erwähne. Denn vyl die scheener Wasserspiil us aigener Quelle hämmer am Bahnhof oobe in dr Passerelle.» D’Käärnebigger

«Y bi dur e Baanhof gloffe, und uf der Passerelle fascht versoffe. Im Grund gnoo isch mir das egaal – s´git Schlimmers do uf Ärde, me kennt jo au als Kunschtobjäggt vom Hirschhorn aagsaicht wäärde.» Peperoni

«Dä Bloome macht uus jeeder Muumie e Gschyss wie uus Petuunie. Är waiblet zwische Niil und Rhyy fascht wien e glaini Fuurie, jetz hänn mir Schiss, är bsuechi bald in Room die hailig Kuurie und bring vo deert denn glyy emool die näggschti frischi Muumie.» Rätschbääse

«Dr Tutanchamun het vyyl Gäld noch Baasel gloggt. Het s´Fluugi haim gnoo, ooni dass en epper frogt. Är hoggt uff d´Schnuure, sitzt mit Bänder gfesslet doot im Sarkophag. Dasch en Ussländer wie-n-en dr Blocher maag.» Dootebainli

«Was macht me mit däm Combino Schrott, wenn kaine me das Drämmli wott? Am Stroosserand loosch es elai, d Elsässer nämme´s als Sperrguet hai.» Käller-Assle

«D´Medielandschaft z´Basel isch allmäligg am verwääse. Die neii BaZ ka bi dämm Niveau heggschtens no e Buschi lääse. Und wenn das Buschi gluggst und schmatzt und lallt, denn hesch esoo no e Brogrammgweerschnitt vo unsrem Radio Basilisk bikoo.» Die Gsalzene

«D´Behringstross, dass muess me see, drennt Nordpolarmeer und Beringsee. Ney lersch jetz in Geographie, Behring heisst e Sumpf am Rhy.» Bangg-Rott

«Der Behring rächnets uns alle voor. Und macht Beersebrognoose uff zääduusig Joor. Nur zääduusig Joor? Jä, do kann er jo hoffe. Bis denn sygy au syny Haftzyt abgloffe. (In zääduusig Joor lauft Gott sei Dangg au die letscht Episoode vo Lüthi & Blangg.)» Die Groobschlächtige

«Im Alter hilft aim gärn und schnäll bi Noot d’Pro Senectute. De Junge ooni Zuekunft bietet Hand d’Pro Juventute. Bruchsch fir s politisch Ämtli Stutz und kaine deerf das gsee. Denn hilft dir mit ere noble Spänd gäärn d’Pro Facile.» D’Syydiaane

«´Sie bruuche Beweegig, sunscht wäärde Sie z´digg. Sie sitze z´vyyl, me gseht´s uff ai Bligg, dryybe Sie doch Sport bi Gläägehait´, hett dr Huusarzt zum Hakan Yakin gsait.» Fäärimaa

«Dr Murat sait zum Hakan, ojee jetz bisch Du e Sans-Papier, do maint dr Hakan, so goot´s halt amme, jetz faar ich Velo, so ains wie d´Mamme.» Nachtschwärmer

«Im Zolli syfzt my Dochter schwäär: ´Lueg Bappi s´Laama Gheeg is läär!´ ´Dasch normal my Schatz, denn voo zwai bis drei diend die spugge iebe bim Alex Frei.´» Käller-Assle

«Dr Kernen fliegt uuse – dr Cuche hauts auf d Schnuure, dr Defago rast grad dur e Abschranggig duure. I gib eych e Root und denn erscht no e gsunde: Macheds wie d’Swiss und blyybed grad dunde!» Schoofsuuri

«´Don´t think – shoot´, dasch nit iiberdriibe hänn sich Bush & Consorte uff d Faane gschriibe. Ych gib dääne jetz mit em Zuunpfool e Wingg, drillets doch um, no haissts: ´Don´t shoot – think.´
Buureregle: No däm Värs darf ych nimm an Mississippi… …dasch em Schuuflebuur doch schyssebibbi!» Schuflebuur

«Dr Ukraine wird befohle, si miesse d Wahle widerhoole, y glaub die ganzi Wält wär froh, es wär in Amerika au esoo.» Dr Pierrot

«Der Charles drampt im Härry krefftig uff d Flosse. Är haig mit sym Goschdyym der Voogel abgschosse. Do muult der glai Härry: Läägg bin ych froh. Zerscht han y no welle als Blocher goo.» Die Groobschlächtige

Share